تشجيع رياضة الطائفية

حسنا من البداية ... لا لا لا علينا البدء من بداية البداية الأولانية،  هى محاولة للفهم وسط كل تلك المتناقضات الغريبة

بعيدا عن باقى أجزاء المجرة ..  فلنتكلم عن مصر وحدها، إحنا بنحب كدة .. أيوة صدقى لازم يكون فى كدة!! .. الموضوع مش مسلم و مسيحى بقدر ماهو مين بيغيظ مين ع القهوة أخر النهار .. فى محاولة بائسة لنفض الأحوال .. لسه مش فاهم؟ طيب نوسع الدايرة ولا أقولك إحنا نوسعها ع الاخر ونجيب كل حاجة من أولها

تعرف ليه الرياضة أصبحت أهم منتج إنسانى على مر العصور؟ ببساطة الرياضة هى عنصرية مشروعة لمشاعر إنسانية - حيوانية  إزاى إنسانية وحيوانية .. أقولك يا سيدى .. الإنسان فى تطور فريد قلب الصراع الحيوانى لصراع أعمق بإضافة توابل العنصرية للمشاعر الحيوانية الموجودة بالأساس بين الذكور مثلا صراعا على الإناث، الحيوانات أصلا مش عندها التفرقة العنصرية الفريدة دى.. يعنى ماشوفناش قبل كدة شوية كلاب بتهاجم كلب لمجرد إنه إسود، إذن والكل يعلم الإنسان كائن عنصرى بطبعه

ننتقل إلى الحالة الأكثر تطورا حالة "المعسكر" إحنا ولاد "جيتو" واحد أنا وإنت أهلاوى ع الزملكاوى اللى ع القهوة .. بسك عليه نقرفه فى عيشته شوية ونتريق عليه .. لأننا وبكل فخر الأغلبية .. صديق كتب على الفيس بوك منذ شهر تقريبا مطالبا بطرد الزملكاوية من مصر .. دة صحيح  

صدقنى الجميع يتعامل مع الموضوع تماما مثل تشجيع كرة القدم .. بيب بيب أهلى .. بيب بيب زمالك .. بيب بيب أنا مسلم .. بيب بيب أنا مسيحى

يتعامل مع الزبيبة والنقاب والصليب المعلق فى الرقبة كتعامله مع إستيكر شعار النادى على زجاج العربية الأمامى وشعار النادى المجسم المتدلدل من المراية

إبتلانى الله بهواية مراقبة الناس، أنا لست طرفا بأى حال من الأحوال، بالأمس المشهد بالنسبة لى إتضح تماما، تعليقات المعلقين على أخبار أحداث العمرانية  تشبه بل تتماثل مع تعليقات نفس الناس على أخبار مباراة الأهلى والزمالك أو الأخبار الخاصة بصراعات الناديين على إختلاف أنواعها وأسبابها .. الجميع يهاجم وينقد ويفند .. الجميع يترحم على أيام السادات ( تماما مثل الترحم على أيام صالح سليم ) الجميع يدعى إن الأرض ملونة بلونه والموقف كله يعبر عن أغلبية تفترس أقلية هى الأخرى سليطة اللسان و قادرة على الرد و بقوة مستندين إلى التاريخ ومنطق اللعبة الحلوة .. اللى هو التسامح أو إحنا أصحاب الأرض القبطية

المسيحيين خرجوا على محافظة الجيزة مطالبينها بإستئناف بناء الكنسية، كسروا مبنى المحافظة إياكش يولعوا فيه حتى، فما الذى يضير المسلمين؟؟

 المثير للسخرية والحزن فى آن واحد إنه من المفترض انها معركتهم معا ضد نظام ديكتاتوري على الجميع، مظاهرة بهذا الشكل من مسلمين كانت ستجد ترحيبا وقبولا بل وبطولة من الجميع سيعتبرونها خروجا من أجل المطالب وإنتزاعا لها بالقوة المبررة .. اما فى حالة المسيحيين فالأمر مرفوض .. صدقنى هى نفس التعليقات !! اليست  تشبه تعليقات الأهلاوية على خناقة النادى المصرى و نادى الزمالك منذ يومان؟

لن يحيا الهلال مع الصليب إلا فى جدول الدورى يا سادة .. والدورى لا يقبل القسمة على إثنين .. كان يقبل زمان مناصفة .. أما اليوم  يلعبون مباراة فاصلة  .. والكل يريدها بلونه

هامش : رغما عنى أفقد الرغبة فى كل شىء .. الكتابة .. المتابعة .. وحتى الحياة فى تلك الأجواء .. كتبت سطر الخاتمة بعد كتابة أول خمسة سطور!!!! أنا من الأساس لا أريد الكتابة عن أى شىء.... لذلك وجب التنويه