جروب ضد الاضراب على الفيس بوك يستخدم الاعلانات المدفوعة للترويج ضد فكرة الاضراب

الواضح ان ماسحى الجوخ و كلاب مبارك عرفوا ان الفيس بوك حلو و جميل و تقدر من خلاله تجمع الشباب الفاضى و مش لاقى حاجة يعملها و زى ما اتجمع 70 الف مع الاضراب يقدروا يجمعوا 70 الف ضده

فجأة الاقى اعلان مدفوع الاجر على يسار موقع الفيس بوك تشجب و تندد بالشغب و العبث بالامن القومى المصرى و تدعو للاشتراك بمجموعة على الفيس بوك ضد فكرة الاضراب و ما حدث خلاله من عبث فى أمن مصر القومى

وصف المجموعة وفقا لما كتبوه فى الفيس بوك

من الفيس بوك خرجت دعوة اضراب 6 ابريل ومن فيس بوك ايضا يجب ان تخرج حملة ادانة لتخريب ممتلكات الناس و قطع الطرق وترويع الامنين - ان ما حدث فى المحلة حطر على الجميع وخطر على الأمن القومى المصري ويتحمل مسئوليته بشكل مباشر القوى السياسية التى سخنت الاوضاع بدون ان تكون لديها اى قدرة على السيطرة على الوضع كما يتحمل نتيجتها ايضا الأمن الذى قام بالبطش بالناس بلا هوادة فاستفز الجميع

أخر أخبار المجموعة

اولا باشكر كل من ساند الجروب دة الى فى خلال ساعات امتلأ بالأعضاء وباستغرب من حالة الفزع الى انتابت "دعاة التغيير" لمجرد وجود صوت مخالف لرأيهم على الفيس بوك وبعدين فورا اتجهوا للاسلوب الرخيص الشهير وهو الاغتيال الشخصى والمعنوى بدلا من المناقشة على طول قالوا دة جروب مباحث وجروب تبع الحكومة والحكومة هى الى عمالاه وكلام فاضى كله يااخواننا انا اسمى هشام عوف ودة اسمي الحقيقى ومكتبى معروف فى جامع الفتح هلييوبوليس كمان انا طول عمرى محسوب على المعارضة مش على الحكومة ولكن هل المعارضة والتغيير يبدأ بحرق السيارات والقطارات ومحلات الناس الغلابة ؟ هو انتم مع الناس ولا ضد الناس ؟ انا كنت متصور ان اول حاجة دعاة التغيير يقولوها انهم ضد الى حصل امبارح مش ويمكن يحاولوا يلزقوه للامن مش يدافعوا كدة عن الباطل- اما عن حكاية الأعلان المدفوع فهو معملوا حد اقصى خمسة دولار فى اليوم يعنى بتمن كرت شحن موبايل مش مبلغ يأكل الناس عيش ولا حاجة