هناك ما يستحق ان نحيا من اجله

يمكن المكان الوحيد اللى هاقدر اتكلم فيه عن كل مشاعرى هو مدونتى … كتير شافوا المنظرين اللى فى الصور دول سواء فى الاستاد او التليفزيون او على مواقع الانترنت مش عارف يمكن لأول مرة أحس ان أسعاد الناس شىء بسيط جدا جدا و أبسط كمان مما كنت متوقع يمكن الزمالك خسر نهاى الكاس بس الكل كان فرحان قوى بالشغل اللى عملته الرابطة فى الماتش و اللى الاهلاوية اكدوا على فشلهم انهم يجاروا الانجاز اللى عملته الرابطة دة بتحويل المدرجات المصرية لقطعة من مدرجات اوروبا

لأول مرة أحس انى قادر على اسعاد الناس و لو بشىء بسيط و بصراحة ما كنتش متوقع و انا بحط التصميمات انها هاتعجب الناس قوى كدة

ناس بسيطة جدا بلاقيهم فى كل مكان بيحضنونى و يهنونى على دخلة الماتش و ازاى انها كانت عالمية و كثير من وسائل الأعلام اتكلمت عنها و نقلتها على الهواء .. يمكن المرة دى حسيت ان الرسالة مش فى مظاهرة و لا اعتصام الموضوع اكبر من كدة بكتير .. الموضوع يتلخص فى كيفية أسعاد البسطاء بأى طريقة كانت بس المهم يتبسطوا حتى لو فى الكورة بدل الهم و الغم اللى هما عايشين فيه

المكان الوحيد اللى فى حياتى اللى حسيت فيه بتقدير على مجهودى هو الرابطة يمكن لأول مرة أحس ان فى بنى أدمين مش عندهم حقد و لا كراهية و قد ايه بيتفننوا فى أعطاء كل واحد حقه من التقدير

بالرغم من كل مشاكلى اللى انا كنت عايز اكتب عنها … و بالرغم من انى فعلا على حافة هاوية و حياتى تقريبا بتنتهى .. بس سعيد و المرة دى عارف انا سعيد ليه الحمد لله